-
بسم الله الرحمن الرحيم
وبه نستعين ،،
مرحبًا بكم في اليوم الثاني بدون وسائل تواصل اجتماعي 👈👉
تتوقعون أصمل زيادة أو لا ؟
المهم أبغى أخلص البربرة قبل حد يجي يزعجني 😁
(طبعن أنا أسولف للهوا بس أتكلم بصيغة الجمع لأن تحمسني أكمل السولافة)
(طبعن أدري إن عندي أغلاط إملائية بالرغم إني مستقعدة للعالم أصحح لهم بس والله قاصدة أغث نفسي 👾)
بالموناسبة :
نسميها أغلاط إملائية أو ثقالة دم إملائية بما اني متعمدة ؟
نرجع للمهم اللي مو مهم :
أحس طاقتي الفترة اللي راحت يدووبك 😪
لاحظت إني إذا اضطريت أجامل أي شخص في مكالمة أو لقاء وأضحك وكذا
والله بعد ما يروح أو أقفل المكالمة نفسيتي تهبط هبووط مدووي إلى الأرض 😖😞
آخرهم اليوم كان عندي خدمة طبية وجت الأخصائية للبيت
طبًا أكيد وحتمًا ولابد بجاملها
هي خرجت من هنا وجاني ضيق تنفس من هنا
الحمدلله إن كان وقت غداء والقدر ينتظرني فما ركزت كثير مع مشاعري وقتها
لكن البلا طلع بعد صلاة العشاء
حسيتني مخنووووقة والبكية كاتمة نفَسي
المهم مرة 2
أمس فرّيت ع السريع ع التدوينات القديمة
الحمدلله يارب انك خليتني أكتب زمان لأن قعدت أتأمل شخصيتي القديمة واهتماماتي السخيفة
ومعاركي اليومية التافهة
وبرغم إني كنت وما زلت ما أكتب إلا وأنا في قمة مشاعري
إلا أن بعض التدوينات والله ماني فاكرة ليش ومتى وكيف كتبتها :(
ما أقصد الاقتباسات طبعًا لأن أي شي يعجبني أسرقه في وقته 😎
بس أقصد كتاباتي أنا
يحزن شوي .. إننا ننسى مشاعرنا بالرغم من قوة سطوتها على عقلي وقلبي في وقتها
و تذكرت كم كان حولي صديقات كثير جدًا في كل مرحلة من دراستي
ولاحظت إني من زمان متذمرة من بعض صفاتي السيئة اللي للآن ناشبتلي 👵
ولاحظت كيف كانت الحياة بسيطة وكل شي يضحكنا قبل تخرب حياتنا كلمة كرنج :(
وكيف كانت همومي صغيرة
ولاحظت إن ذائقتي في الاقتباسات رفيعة المستوى من يومي
لأني قربت أناصف الثلاثين وعندي كم شيبة في شعري لكنها للآن تعجبني 😆
وبسس والله
مافي شي مهم
إلى اللقاء قريبًا !
صح أفكر أسوي نيو صطايل بس عاد مدري متى يزين المود 😇
ليست هناك تعليقات:
إرسال تعليق